Kennarar segja að það hafi aukist að konur sæki í raungreinar eins og tækni-og verkfræði en karlar leiti síður í hjúkrunarfræði eða kennaranám. Þar sé allt að 90% nemenda konur. „Þannig að strákarnir eru ekki að leita í þær greinar og við þurfum að breyta því.“ Konur eru einnig mun fleiri en karlar í kennarastétt. Konur eru 91% þeirra sem eru nú í kennaranámi við Háskóla Íslands. Washington Post segir að aukning hafi orðið meðal karla í náminu eftir þátttöku Pollapönks í Eurovision árið 2014 en tveir meðlima hljómsveitarinnar eru leikskólakennarar. Sérfræðingar telji að besti árangurinn gegn fastmótuðum kynjahugmyndum um ákveðin störf náist með því að hafa góðar fyrirmyndir sem gangi gegn þeim. Í Washington Post kemur fram að þótt karlar séu aðeins fleiri meðal íslensku þjóðarinnar þá klári fleiri konur BA- og MA-gráður en karlar. Það sama eigi við um doktorsgráður. Þessar upplýsingar hefur blaðið frá Jafnréttisstofu. 59 prósent kvenna á höfuðborgarsvæðinu hafi klárað háskólanám en 45 prósent karla. Á landsbyggðinni sé hlutfallið 40 prósent kvenna og 19 prósent karla.